Gen 26 | NdeIBE | STEP | Kwaba khona indlala elizweni – ngaphandle kwendlala yamandulo eyesikhathi sika-Abhrahama – u-Isaka waya ku-Abhimeleki inkosi yamaFilisti eGerari.

Genesis 26

U-Isaka lo-Abhimeleki

1 Kwaba khona indlala elizweni – ngaphandle kwendlala yamandulo eyesikhathi sika-Abhrahama – u-Isaka waya ku-Abhimeleki inkosi yamaFilisti eGerari. 2 UJehova wabonakala ku-Isaka wathi, “Ungehleli eGibhithe; hlala elizweni engithi hlala khona.

3 Ake uhlale kulelilizwe okwesikhatshana, mina ngizakuba lawe ngikubusise. Ngoba wena lezizukulwane zakho ngizalinika wonke amazwe la njalo ngiqinise isifungo engasifunga kuyihlo u-Abhrahama. 4 Ngizakwenza izizukulwane zakho zibe zinengi njengezinkanyezi emkhathini, ngizinike wonke lamazwe, njalo kuthi ngenzalo yakho zonke izizwe emhlabeni zizabusiswa, 5 ngokuba u-Abhrahama wangilalela, wagcina izimiso zami, lemilayo yami, izimemezelo zami lemithetho yami.”

6 Ngakho u-Isaka wahlala eGerari.

7 Kwathi lapho abantu baleyondawo bembuza ngomkakhe wathi, “Ngudadewethu,” ngokuba wayesesaba ukuthi, “Ngumkami.” Wacabanga wathi, “Amadoda alapha angangibulala ngenxa kaRabheka, ngokuba muhle kakhulu.”

8 Kwathi u-Isaka esehlale khona okwesikhathi eside, u-Abhimeleki inkosi yamaFilisti wakhangela ngewindi wabona u-Isaka egone umkakhe uRabheka. 9 Yikho wasebiza u-Isaka wathi, “Kanti ngumkakho ngeqiniso! Kungani uthe ungudadewenu?” U-Isaka wamphendula wathi, “Ngoba ngakhumbula ukuthi ngingaqabuka ngilahlekelwa yimpilo yami ngenxa yakhe.”

10 U-Abhimeleki wasesithi, “Kuyini lokhu okwenzileyo kithi? Omunye wamadoda ubezaqabuka elala laye umkakho, ubususibangela icala.”

11 Ngakho u-Abhimeleki wasekhupha umlayo kubantu bonke wathi, “Lowo ozake ayithinte indoda le loba umkayo ngempela uzabulawa.”

12 U-Isaka walima amabele kulelolizwe, ngalowomnyaka wavuna okuphindwe ngekhulu, ngoba uJehova wambusisa. 13 Yanotha indoda, kwathi imfuyo yayo yanda yaze yaba yisipatsha. 14 Kwakungasimihlambi yezimvu leyezinkomo kanye lezisebenzi, amaFilisti aze aba lomona ngaye. 15 Kwasekusithi yonke imithombo eyayinjiwe yizisebenzi ngesikhathi sikayise u-Abhrahama, amaFilisti ayivala ngokuyigqibela ngenhlabathi.

16 U-Abhimeleki wasesithi ku-Isaka, “Suka kithi; ususuke waba lamandla kakhulu kulathi.”

17 Ngakho u-Isaka wasuka lapho wayakuma eSigodini saseGerari, wahle wakha khona. 18 UIsaka wayiphanda imithombo eyayinjiwe ngesikhathi sikayise u-Abhrahama, eyayigqitshelwe ngamaFilisti ngemva kokuba u-Abhrahama esefile, wayibiza ngawona lawo mabizo uyise ayeyibiza ngawo.

19 Izisebenzi zika-Isaka zagebha esigodini zafumana umthombo olamanzi amahle khonapho. 20 Kodwa abelusi baseGerari baxabana labelusi baka-Isaka bathi, “Amanzi la ngawethu!” Ngakho umthombo lowo wawuthi yi-Eseki, ngokuba bawubanga laye. 21 Yikho basebesimba omunye umthombo, kodwa lawo bawubanga njalo; wasewubiza ngokuthi yiSithina. 22 Wasuka lapho wayagebha omunye umthombo, akwabe kusaba khona owubangayo. Wawuthi yiRehobhothi, esithi, “Manje uJehova usesiphile indawo, sesizaphumelela kuleli ilizwe.”

23 Esuka lapho waya eBherisheba.

24 Ngalobobusuku uJehova wabonakala kuye wathi, “NginguNkulunkulu kayihlo u-Abhrahama. Ungesabi, ngokuba ngilawe; ngizakubusisa ngandise ubunengi bezizukulwane zakho ngenxa yenceku yami u-Abhrahama.”

25 U-Isaka wakha i-alithare khonapho wamemeza ibizo likaJehova. Wamisa ithente lakhe khonapho, izisebenzi zakhe zemba umthombo khonapho.

26 Ngasonalesi isikhathi u-Abhimeleki weza kuye evela eGerari, elo-Ahuzathi umeluleki wakhe loFikholo umlawuli wamabutho akhe.

27 U-Isaka wababuza wathi, “Lilandeni kimi, ikanti lalingizonda laze langixotsha?”

28 Bamphendula bathi, “Sabona kamhlophe ukuthi uJehova wayelawe; yikho sasesicabanga ukuthi kumele kube lesivumelwano esifungelweyo phakathi kwethu thina lawe. Kasenze isibopho lawe 29 esokuthi kawusoze usihlukuluze, njengoba lathi singazange sikulimaze ngalutho kodwa sakuvalelisa ngokuthula. Khathesi usubusisiwe nguJehova.”

30 U-Isaka wasebenzela idili, badla banatha.

31 Ekuseni kakhulu ngakusasa amadoda wonke enza isifungo omunye komunye. U-Isaka wasebavulela indlela bahamba ngokuthula.

32 Ngalolosuku izisebenzi zika-Isaka zeza zamtshela ngomthombo ezaziwumbile. Zathi, “Sesiwazuzile amanzi!” 33 Wawuthi yiShiba, osekuze kube namuhla idolobho kuthiwa yiBherisheba.

34 Kwathi u-Esawu eseleminyaka yobudala engamatshumi amane, wathatha uJudithi indodakazi kaBheri umHithi njalo loBhasemathi indodakazi ka-Eloni umHithi. 35 Baletha ukukhathazeka kakhulu ku-Isaka loRabheka.